Policia e Beratit ka finalizuar dy operacione të njëpasnjëshme kundër shpërndarjes së drogave të forta, duke çuar prapa hekurave dy persona dhe duke vënë nën hetim një të tretë.
Specialistët e Seksionit për Hetimin e Narkotikëve, të mbështetur nga Forca e Posaçme Operacionale, kanë goditur veprimtarinë e shitjes së lëndëve narkotike në qytetet e Kuçovës dhe Skraparit, ku është sekuestruar lëndë e dyshuar si kokainë.
Sipas policisë, rasti i parë u godit në Kuçovë, ku shërbimet e policisë ndaluan shtetasin S. K., 32 vjeç.
“Pas një kontrolli fizik të ushtruar ndaj tij, agjentët i gjetën dhe sekuestruan një sasi lënde narkotike të llojit kokainë, duke bërë arrestimin e tij në flagrancë”, thuhet në njoftim.
Operacioni vijoi edhe në zonën e Skraparit, konkretisht në Poliçan, ku në pranga ra 40-vjeçari E. S. Gjatë kontrollit të ushtruar në automjetin e tij, si dhe më pas në banesë, policia zbuloi doza kokaine gati për shitje.
“Në të njëjtin mjet udhëtonte edhe shtetasi F. Sh., 41 vjeç, banues gjithashtu në Poliçan. Atij iu gjet një sasi e vogël kokaine dhe për këtë arsye u procedua penalisht në gjendje të lirë.”, thuhet në njoftim.
Materialet procedurale për të dyja rastet i kanë kaluar Prokurorisë pranë Gjykatës së Shkallës së Parë Berat, për veprën penale të prodhimit dhe shitjes së narkotikëve.
