Policia e Tiranës ka finalizuar operacionin e koduar “Last Bet”, duke goditur tre raste të organizimit të kundërligjshëm të lojërave të fatit. Si rezultat i operacionit, janë arrestuar dy persona, katër të tjerë janë proceduar në gjendje të lirë, ndërsa dy shtetas janë shpallur në kërkim.
Gjatë kontrolleve, policia zbuloi tre ambiente ku organizoheshin lojëra fati dhe sekuestroi 3 makineta, 1 tavolinë pokeri, çipsa, letra bixhozi dhe 5 telefona celularë, të cilët dyshohet se përdoreshin për këtë veprimtari të paligjshme.
Sipas policisë, specialistët për Hetimin e Krimeve të Komisariatit Nr. 1 arrestuan në flagrancë shtetasin G. Zh., 22 vjeç, ndërsa shpallën në kërkim M. Zh., 50 vjeç dhe A. Zh., 25 vjeç. Ata dyshohet se organizonin lojëra fati në një ambient të marrë me qira në rrugën “Aleks Çaçi”. Në këtë ambient u sekuestruan dy makineta për lojëra fati, një tavolinë pokeri, çipsa dhe letra bixhozi.
Ndërkohë, specialistët e Komisariatit Nr. 5 arrestuan në flagrancë shtetasin G. S. (J.), 39 vjeç, pasi në lokalin që administronte me qira në Bathore u gjetën një makinetë dhe një telefon celular që dyshohet se përdoreshin për organizimin e lojërave të fatit.
Po ashtu, specialistët e Seksionit për Hetimin e Krimeve Kibernetike referuan materialet në Prokurori dhe nisën procedimin penal ndaj shtetasve S. G., 21 vjeç, O. C., 19 vjeç, R. H., 27 vjeç dhe F. D., 67 vjeç. Gjatë kontrollit në një lokal në rrugën “Irfan Tomini”, secilit prej tyre iu gjet nga një telefon celular që dyshohet se përdorej për organizimin e basteve sportive.
Materialet procedurale i janë referuar Prokurorisë së Tiranës për veprime të mëtejshme.
