Eksperti i kriminologjisë, Ervin Karamuço bën thirrje që ish-kreu i Policisë së Shtetit, Gledis Nano të merret në mbrojtje pasi mund të jetë i kërcënuar nga grupet terroriste.
Sipas tij, ish-kreu i Policisë së Shtetit mund të vihet në shënjestër pas publikimit të emaileve të postës së tij elektronike nga grupi i hakerave ‘Homeland Justice’ por edhe për shkak të operacioneve kundër grupeve terroriste që ka drejtuar.
“Ai është një target për shkak se ka qenë drejtor i anti-terrorit. Ka qenë njeriu që i është vënë nga mbrapa të gjitha grupeve terroriste në Shqipëri. Ka informacion për këta. Është ekspozuar për Sirinë, është ekspozuar për Iranin. Ka bërë operacione që shumica e tyre nuk do të dihen, disa kanë qenë shumë të suksesshme që ju kanë bërë shumë dëm atyre”, u shpreh Karamuço gjatë një interviste për ‘Abc News’.
Gledis Nano u shkarkua si Drejtor i Përgjithshëm i Policisë së Shtetit më 31 gusht. Një javë më pas, në vend të tij u emërua, Muhamet Rrumbullaku.
