Hendeku mes të pasurve dhe pjesës tjetër të popullsisë është nga temat më të nxehta për debat.
Një studim i fundit publikuar nga CNBC ka dalë në përfundimin se numri i milionerëve në botë u rrit në rreth 46.8 milionë gjatë vitit të kaluar dhe ata tani zotërojnë gati gjysmën e pasurisë së botës.
Sipas këtij raporti, 44 përqind e pasurisë totale të botës ndodhet në duart e këtyre milionerëve.
Referuar të dhënave, numri më i madh i milionerëve jetojnë në SHBA. 675,000 milionerë të rinj u shtuan në SHBA gjatë vitit të kaluar, 187 mijë në Japoni, dhe 158 mijë në Kinë. Ndërsa e kundërta rezulton në Australi, ku numri i milionerëve shënoi rënie.
Përqendrimi i pasurisë në duart e një pakice ka ngjallur debat në rradhët e kandidatëve demokratë për zgjedhjet presidenciale amerikane. Elizabeth Warren dhe Bernie Sanders kanë propozuar një taksë pasurie për këtë qëllim. Sipas propozimit të tyre, ata do të vendosnin një taksë mbi aktivet dhe kursimet e akumuluara, sesa thjesht mbi të ardhurat.
