“Ka Një Mesazh Për Ty” ka shkuar në shtëpinë e Dallëndyshes në Patos për të realizuar dëshirën e saj. Moderatori i së “Dielës Shqiptare” në Tv Klan, Ardit Gjebrea shoqërohet nga Flutura që ka ardhur nga Anglia për t’i dhuruar sadopak lumturi dikujt.
Dallëndyshja ka një histori shumë të dhimbshme. Në vitin 2019 ajo humbi vajzën në moshën 23-vjeçare. Asokohe kishte probleme me shikimin, por pas tragjedisë ka mbetur e verbër. Vajza i ka lënë pas dy fëmijë, Serdjanën dhe Oltin që Dallëndyshja i ka peng. Serdjanën e solli në jetë nga një dashuri e hershme, në moshën 16-vjeçare.
Dallëndyshe: I kam rritur me shumë mundime, sakrifica, nuk e ke idenë sesi e kam rritur unë atë Danën. Megjithatë, u lidh me një djalë tjetër. Jeta vazhdon.
Ardit Gjebrea: Sa vjeç ishte vajza kur u lidh me atë djalin, të parin?
Dallëndyshe: 16.
Ardit Gjebrea: Dhe sa vjeç ishte kur u bë nënë për herë të parë?
Dallëndyshe: 16.
Ardit Gjebrea: 16 vjeçe u bë nënë?
Dallëndyshe: Po. Me tjetrin u lidh pas një viti, edhe ky nuk punonte, rrinin bashkë me mua. Në jetë solli djalin, Oltin. Pastaj mori rruga si të thashë që iku nga kjo jetë, më la dy pengje, si Danën dhe Oltin. Prandaj kërkoj dhe e shkrova, dua “Ka Një Mesazh Për Ty” që Danën ta gëzoj një çikë se asnjëherë s’i kisha bërë ditëlindje, asnjëherë s’kam bërë Vit të Ri. Megjithatë unë sot jam shumë e gëzuar.
Ardit Gjebrea: Ti doje që t’i sillje në studio?
Dallëndyshe: Unë doja t’i sillja në studio, t’i gëzoja.
Ardit Gjebrea: Ata të dy?
Dallëndyshe: Të dy!
Ardit Gjebrea: Ku janë ata sot?
Dallëndyshe: Ata janë në Sarandë, te Shtëpia e Fëmijës.
Ardit Gjebrea: Po pse?
Dallëndyshe: Po nuk i mbaja dot si isha. Unë nuk i dhashë vetë, mua m’i kanë marrë me zor në spital.
Ardit Gjebrea: Nuk është se ti doje që t’i çoje në Shtëpinë e Fëmijës?
Dallëndyshe: Jo, unë i dua në gji. Pavarësisht se jam kështu, dua t’i kem zogjtë e mi nëpër këmbë./tvklan.al
