Gjyqtari i Apelit të Durrësit Besim Trezhnjeva ishte ndër të parët gjykatës që u shkarkua nga Komisioni i Pavarur i Kualifikimit, një vendim të cilin Trezhnjeva do ta apelonte në instancën e dytë të vettingut, Komisionin e Posaçëm të Apelimit (KPA)
Këtë të enjte KPA ka dhënë përgjigje për apelin e Trezhnjevës, duke lënë në fuqi vendimin e marrë nga KPK për shkarkimin e tij nga sistemi i drejtësisë.
Në seancën që Trezhnjeva u vettua nga goja e tij nuk doli asnjë fjalë, përveçse emrit dhe mbiemrit, një procedurë kjo formale si ato nëpër gjykata.
KPK doli në përfundimin se Trezhnjeva kishte bërë deklarim të rremë të pasurisë si dhe se nuk justifikonte disa pjesë të saj.
Në raportin e krijuar në lidhje me pasurinë, rezultonte se nga koha kur kishte nisur punën e deri më sot, gjyqtari I Apelit kishte thuajse 5 fishuar pasurinë e tij.
Njoftimi i plotë i KPA
Trupa gjykuese e Kolegjit të Posaçëm të Apelimit, kryesuar nga Ardian Hajdari, relator Luan Daci dhe anëtarë Ina Rama, Rezarta Schuetz, Sokol Çomo, sot, më datë 26.07.2018, ora 10:00, në dhomë këshillimi, bazuar në nenin 66/1 gërma “a” të ligjit 84/2016 “Për rivlerësimin kalimtar të gjyqtarëve dhe prokurorëve në Republikën e Shqipërisë”, vendosi:
Lënien në fuqi të vendimit N14 datë 13.04.2018, të Komisionit të Pavarur të Kualifikimit që i përket subjektit të rivlerësimit z. Besim Trezhnjeva. Ky vendim është përfundimtar, i formës se prerë dhe hyn në fuqi menjëherë. Kundër këtij vendimi lejohet ankim në Gjykatën Evropiane të të Drejtave të Njeriut.
U shpall sot, në Tiranë më datë 26.07.2018.
