Ndryshimet në Kodin e Procedurës Penale, të hyra në fuqi në datën 1 gusht, sot sollën një figurë të re që është ajo e gjyqtarit të hetimeve paraprake, i cili merr detyrën në datën 1 shtator. Por këtë risi të legjislacionit, dy gjykata, ajo e Krimeve të Rënda dhe Gjykata e Tiranës, e kanë lexuar në mënyra të ndryshme për formën sesi caktohet gjyqtari i hetimeve paraprake.
Me një urdhër të shpërndarë në fund të korrikut, gjyqtarët e Dhomës Penale të Tiranës janë informuar se, vetëm 12 prej tyre do të kenë të drejtën të jenë pjesë e trupave që do të shqyrtojnë çështje të ngjashme në themel.
Plot 12 gjyqtarë të tjerë janë caktuar me një grafik, si gjyqtarë të seksionit të hetimeve dhe seancës paraprake. Këta gjyqtarë, sipas këtij urdhri nuk kanë të drejtë të trajtojnë çështje themeli, përveç dosjeve që nuk i kanë përfunduar ende.
Por ky urdhër konsiderohet i diskutueshëm nga gjyqtarët, sipas të cilëve gjykata më e madhe në vend dhe me fluksin më të madh do të futet në kolaps.
Burimet thonë se deri më tani i janë dorëzuar gjykatës 800 dosje, për të cilat pritet të hapet shqyrtimi gjyqësor prej vetëm 12 gjyqtarëve të mbetur. Ndërkohë që 12 gjyqtarët paraprakë do të kenë kompetencat për të vendosur mbi hetimet paraprake dhe për të konfirmuar dërgimin e dosjes në gjykim, pushimin e saj, ose zgjidhjen me marrëveshje.
Ndryshe nga sa paraqitet situata në Gjykatën e Tiranës, Gjykata e Krimeve të Rënda ka një lexim tjetër të ligjit. Të gjithë gjyqtarët e Krimeve të Rënda kanë mundësinë të jenë po ashtu gjyqtarë paraprakë, sipas një grafiku që llogaritet çdo javë.
Besohet se kjo është fryma e duhur, me të cilën është lexuar nga njerëzit e ligjit risia më e fundit, e kundërshtuar në fakt edhe në Gjykatën Kushtetuese nga komuniteti i prokurorëve, që mendon se po ndërhyhet në atributet e akuzës. /tch
