Në Gjykatën e Posaçme Kundër Korrupsionit dhe Krimit të Organizuar (GjKKO) është zhvilluar këtë të enjte seanca e radhës mes Gazmend Bardhit dhe ish-drejtorit të Policisë së Shkodrës, Edmond Sulaj.
Në sallën e gjyqit ishte i pranishëm vetëm Edmond Sulaj së bashku me avokatin e tij mbrojtës, ndërsa Gazmend Bardhi u përfaqësua nga avokatët Ledjo Braho dhe Marash Logu.
Gjatë seancës, avokati i Sulajt kërkoi riçeljen e hetimit gjyqësor, duke argumentuar se avokatët e Bardhit pretendojnë të kenë dokumente zyrtare dhe akte që, sipas tij, nuk i kanë vënë në dispozicion. Ai kërkoi që gjykata të marrë dhe verifikojë këto dokumente, për të përcaktuar nëse bëhet fjalë për të njëjtin individ që pretendojnë avokatët e Bardhit.
Avokati Ledjo Braho, në mbrojtje të Bardhit, deklaroi se këto dokumente kanë qenë fillimisht në posedim të mediave, përpara se të bëheshin publike nga Gazmend Bardhi.
Pas dëgjimit të palëve, gjykata u tërhoq në dhomë këshillimi dhe vendosi të pranojë kërkesën për rihapjen e hetimit gjyqësor.
Gjykata gjithashtu vendosi t’i drejtohet SPAK me një kërkesë për të verifikuar, pa cenuar hetimet në vijim, nëse dokumenti i lexuar nga Bardhi është pjesë e fashikullit gjyqësor të dosjes “Metamorfoza”.
Seanca e radhës u shty për në 14 shkurt, ora 09:00.
Bardhi akuzoi në parlament ish-drejtuesin e policisë në Shkodër se ishte emëruar në detyrë nga krimi i organizuar.
Ish-drejtuesi i policisë iu përgjigj duke e kallëzuar në gjykatë, pasi përgjimet e SKY ECC që pretendon Bardhi nuk janë në të njëjtën kohë kur ai ishte në detyrë.
