Procesi gjyqësor ndaj Berishës dhe të bashkëpandehurve të tjerë të dosjes “Partizani” është shtyrë për në datën 15 shtator.
Nderkohe, kryetari i Partisë Demokratike Sali Berisha kishte zgjedhur të çonte avokatët e tij në seancën gjyqësore në GJKKO, për dosjen “Partizani”. “Do të paraqesim pretendimet tona”, tha Berisha sot, 21 korrik, para ambienteve të Prokurorisë së Posaçme.
Edhe pse u shpreh se nuk ka pretendime për palën gjykuese të dosjes “Partizani”, mësohet se avokati i tij, Genc Gjokutaj ka kërkuar në seancën që po zhvillohet në GJKKO, përjashtimin e tyre.
“Nuk janë të pavarur! Kërkojmë caktimin e gjyqtarëve jashtë Gjykatës së Posaçme për shqyrtimin e kësaj çështjeje”, citohet të ketë thënë Gjokutaj.
Bëhet fjalë për treshen e gjyqtarëve, Elsa Ulliri (kryesuese) dhe relatorët Bib Ndreca e Rudina Palloi.
Në paraqitjen e tij të shkurtër në SPAK, kryedemokrati i la një shënim Altin Dumanit, kreut të kësaj strukture. Nuk hezitoi me akuzat në drejtim të tij dhe gjyqtares Irena Gjoka.
Kujtojmë se kjo dosje lidhet me privatizimin e ish-kompleksit sportiv “Partizani” në Tiranë, që dikur ishte pronë e Ministrisë së Mbrojtjes. Hetimet e SPAK pretendojnë se ky proces është zhvilluar në mënyrë të paligjshme dhe ka sjellë përfitime të padrejta për Jamarbër Malltezin, dhëndrin e ish-kryeministrit Sali Berisha.
Sipas Prokurorisë së Posaçme, Berisha dyshohet se ka favorizuar dhëndrin përmes vendimeve qeveritare në kohën kur ishte kryeministër. Malltezi akuzohet për përfitime të paligjshme në vlerën e 5.4 milionë eurove. Berisha ndodhet në “detyrim paraqitje”, ndërsa Malltezi vijon të jetë në arrest shtëpie.
