Procesi gjyqësor ndaj ish-udhëheqësve të Ushtrisë Çlirimtare të Kosovës, Hashim Thaçi, Kadri Veseli, Rexhep Selimi dhe Jakup Krasniqi, po hyn në një fazë të re dhe të rëndësishme. Ekipet e mbrojtjes janë urdhëruar të paraqesin një mocion të përbashkët për rrëzimin e pikave të aktakuzës deri më 12 qershor 2025.
Ky mocion lidhet me kundërshtimet e mundshme për vazhdimin e procesit ose me kërkesa të tjera procedurale nga ana e mbrojtjes. Ndërkohë, Prokuroria e Specializuar (ZPS) duhet të dorëzojë përgjigjen e saj deri më 7 korrik 2025, një afat ky i shkurtuar nga vetë trupi gjykues. Fillimisht, afati për ZPS-në ishte 14 korriku.
Avokati Ardian Bajraktari vlerëson se rrëzimi i tërësishëm i aktakuzave do të ishte një epilog real dhe i dëshirueshëm i këtij procesi të stërzgjatur dhe me, sipas tij, “shkelje të shumta”. Megjithatë, ai pret që rrjedha e mëtejshme e gjyqit të bëhet më e qartë pas datës 14 korrikut, kur të jetë dorëzuar përgjigja e Prokurorisë dhe të merret një vendim nga trupi gjykues.
Bajraktari thekson se vendimi i trupit gjykues në korrik do të jetë “rrethanë determinuese” për ecurinë e mëtejshme të procesit. Ai shpreh shpresën se gjyqi në shkallën e parë do të përfundojë brenda këtij viti ose “më së largu” vitin e ardhshëm.
Kjo datë e fundit për dorëzimin e mocionit të mbrojtjes dhe përgjigjes së Prokurorisë shënon një moment kyç, pasi do të përcaktojë nëse aktakuzat do të vazhdojnë në formën aktuale, do të rrëzohen pjesërisht apo tërësisht, apo do të ketë ndryshime të tjera procedurale.
Hashim Thaçi, Kadri Veseli, Rexhep Selimi dhe Jakup Krasniqi mbahen në paraburgim në Hagë prej 5 vjetësh.
