Deputetja e Partisë Socialiste, Blerina Gjylameti e ftuar dje në studio televizive, ka folur për Kongresin e Partisë Socialiste dhe diskutimet që do të përfshihen në këtë Kongres. Gjylameti foli për të gjitha temat e nxehta të momentit që përfshijnë zgjedhjen e Presidentit, ndryshimet në Qeveri, aferën e inceneratorëve apo legalizimin e kanabisit. Në lidhje me ndryshimet e përfolura në Qeveri, deputetja tha se kjo është kompetencë e Ramës, por nuk mendon se është momenti i duhur për ta bërë.
“Është një kompetencë e kryeministrit e kryetarit të partisë për të pasur skuadrën e tij. Nuk mendoj që është një moment për ndryshime në qeveri, unë besoj se edhe në këtë vit në duhet të jemi në lartësinë e detyrë për t’ju përgjigjur qytetarëve shqiptarë”, tha ajo.
Sa i përket çështjes më të diskutuar në ditën e djeshme, legalizimin e kanabisit për qëllime mjekësore, Gjylameti iu shmang dhe tha se është një proces që nuk e dinte se kur do të ndodhë.
“Është një proces dhe nuk e di kur do të ndodhë. Kongresi në pjesën e parë ka panelet e hapura ku të gjithë kanë mundësi të trajtojnë shqetësimet e tyre dhe është një mundësi shumë e mirë për të qenë të pranishëm. Nëse duhet të kishim ndryshime në kuadër të krizë në Ukrainë, theksoj se duhet të jemi të kujdesshëm në informacionet e transmetuara”, deklaroi Gjylameti.
E pyetur për zgjedhjen e presidentit të ri, deputetja theksoi se kreu i ri i shtetit nuk duhet të jetë afër politikës, dhe do konsultohen me opozitën zyrtare për zgjedhjen e tij.
“Mendoj që nuk do të duhet të jetë kaq afër politikës. Do të konsultohemi me opozitën zyrtare. Ka ardhur momenti që palët të zbresin nga llogoret politike dhe të bëhen bashkë për interesa kombëtare” u shpreh ligjvënësja për zgjedhjen e presidentit të ri.
Ndërsa sa i përket arrestimeve për aferën e inceneratorëve, Blerina Gjylameti tha se Partia Socialiste nuk është mburojë për personat që shkelin ligjin, dhe kush e shkel atë, duhet të përgjigjet para drejtësisë.
/a.r
