Ish-prokurori i Gjykatës Ndërkombëtare për Krime Lufte në ish-Jugosllavi, Sir Geoffrey Nice ka qenë i drejtpërdrejtë. Ai ka theksuar se Gjykata Speciale nuk mund t’i sjellë ndonjë dobi imazhit të Kosovës. Sir Geoffrey Nice, ish-Prokuror në Tribunalin e Hagës, thotë se është mjaft e qartë që kjo gjykatë, së paku jo në afat të shkurtër, nuk pritet të sjellë ndonjë dobi a përfitim për Kosovën apo qytetarët e saj, jo në kuptimin e imazhit që ka në botë.
“Nuk do të sjellë ndonjë dobi, e në të vërtetë do t’i shërbejë interesave të Serbisë. Më duhet ta përsëris, kjo gjë po imponohet për arsye politike, e nuk mund të dihen variablat e këtij ekuacioni, të këtij vlerësimi, në mendjet e atyre që janë të vendosur që kjo gjykatë duhet themeluar dhe duhet të jetë efektive”, ka thënë Nice në një intervistë dhënë televizionit publik. Ndër të tjera, Sir Geoffrey Nice nuk e përjashton mundësinë që krijimi i Gjykatës Speciale për Kosovën të jetë reflektim i dështimit të komunitetit ndërkombëtar në Kosovë.
Britaniku ka folur edhe për gjykimin e diktatorit serb, Slobodan Milosheviq, i cili pati vdekur pa marrë një ndëshkim nga Tribunali i Hagës.
