Gjykata Administrative e Shkallës së Parë rrëzoi kërkesën e Rovena Gashit për pezullimin e urdhrit të Kryeprokurores së Përkohshme Arta Marku, e cila e largoi atë nga posti i Drejtoreshës së Marrëdhënieve Juridiksionale me Jashtë në Prokurorinë e Përgjithshme.
Gjykata pasi dëgjoi pretendimet e palëve, të avokatit mbrojtës së Gashit, Çlirim Gjata, dhe përfaqësueses së Prokurorisë së Përgjithshme, Pranvera Grugda, vendosi ta rrëzojë këtë kërkesë të parë të Gashit.
Në përfundim të seancës, avokati Gjata tha se do t’i drejtohet Apelit për ta kundërshtuar këtë vendim. Ai ngriti pretendime se urdhri është në kundërshtim me ligjin dhe i pavlefshëm. Ai tha se largimi Gashit nga detyra është bërë pa motivacion.
“Urdhri i lirimit nga detyra është diçka cinike. Shkëlja e parë është bërë se urdhri është dhënë nga dikush që nuk e ka kompetencë. Dhe shkelja e dytë është sepse është liruar nga detyra një drejtoreshe drejtorie pa asnjë motivacion”, tha avokati Gjata.
Nga ana tjetër, përfaqësuesja e Prokurorisë tha se nuk ka asnjë shkelje në urdhrin e Markut, dhe se latimi i Gashit është bërë në kuadër të mirëfunksionimit të organit të akuzës. Sipas saj, Gashi vazhdon të jetë prokurore. Në 31 janar do të mbahet seanca e radhës, dhe pritet të shihet se çfarë vendimi do të japë Gjykata ndaj kërkesës së Rovena Gashit.
Në kërkesën e saj, Gashi ka hedhur akuza ndaj Markut, duke pretenduar se shkak i lëvizjes, ka qenë kërkesa drejtuar KQZ-së, për heqjen e mandateve të dy deputetëve, Aqif Rakipi dhe Gledjon Rehovica.Gashi thotë në padinë drejtuar Gjykatës Administrative, se Prokurorja e Përgjithshme e Përkohshme, nuk ka të drejtë të miratojë ose të ndryshojë organikën e Prokurorisë. Sipas Gashit, emërimi i saj në krye të Marrëdhënieve Juridiksionale me jashtë është bërë në bazë të urdhrave të Prokurorit të Përgjithshëm, të cilat janë ende në fuqi dhe se Kryeprokurorja e përkohshme, nuk mund të shkarkojë sipas kompetencave të Kryeprokurorit të përgjithshëm.
