Gjykata e Shkallës së Parë Tiranë vendosi pasditen e së hënës pezullimin për procesin në lidhje me regjistrimin e statutit të Lulzim Bashës në PD. Pezullimi do të jetë i vlefshëm deri në një vendim të formës së prerë. Përfaqësuesi ligjor i PD-së, Indrit Sefa thotë se asnjë strukturë e PD nuk preket nga ky vendim.
“Asnjë strukturë e PD nuk afektohet, është një vendim i paraprirë nga Apeli me 3 mars, që ka përcaktuar që në rast regjistrimi të tilla përcaktohet shqyrtimi i kërkesës së ardhur dhe ishte një vendimmarrje që do të reflektohej nga ana e gjykatës, që u kërkua nga palët për pezullimin e gjyqit që u pranua në seanca edhe nga ne duke qenë se palët e tjera nuk donin t’i hynin shqyrtimit të kërkesave tona, atëherë kërkuam pezullimin e këtij shqyrtimi. Asgjë gjë nuk ka ndodhur në PD.“, tha ai.
Ai thotë se kreu i grupit parlamentar vijon të jetë Basha.
“Nuk ka një kryetar përveç Bashës. I autorizuar prej tij për të ndjekur punimet ka detyrë Flutura Açka. Këto janë çështje administrative që lidhen me mënyrën organizative të partisë. Është një procedurë normale për reflektimin e disa ndryshimeve.“, shtoi Sefa.
Ai thotë se edhe në çështjen e sotme, gjykata i referohet Bashës si kryetar i PD-së.
“Të gjitha vendimmarrjet e PD janë ligjore dhe në fuqi. Çdo person që ka pretendim me këto vendimmarrje apo qenien ose jo të Bashës si kryetar të PD mund t’i drejtohet gjykatës sa herë ta shohin të nevojshme. Ne iu referuam edhe atyre, edhe gjykatës. Të jenë të gatshëm për një debat gjyqësor në lidhje me vendimmarrjet e PD, jemi të gatshëm dhe të përballemi me to gjyqësisht me cilindo. Kur të jenë më komod jemi të gatshëm të përballemi me ta.“, tha Sefa./m.j
