Ish Prokurori, Haxhi Giu, i arrestuar për korrupsion në këmbim të drejtësisë, do vazhdojë të qëndrojë në burg. Ky ka qenë vendimi i Gjykatës së Krimeve të Rënda sot, ku ka rrëzuar kërkesën e Giut për ndryshimin e masës së sigurisë.
Prokuroria ka kërkuar 4 vjet burg për ish Prokurorin, ndërsa pala mbrojtëse fokusohet te gjendja shëndetësore e Giut.
Përmes avokatit të tij, ish prokurori kërkoi ndryshim të masës nga arrest me burg në një tjetër më të lehtë. Por, ndërsa avokati përsëriti se gjendja shëndetësore e ish-prokurorit është shqetësuese, ekspertët e mjekësisë ligjore kanë deklaruar të kundërtën.
Dy ekspertë i janë përgjigjur Gjykatës me akt ekspertizë, ku nënvizojnë se ish-prokurori vuan nga hipertensioni kardiak. Por, sipas ekspertëve, nga kjo sëmundje atij nuk i rrezikohet jeta në burg, siç edhe pretendon mbrojtja, ndërkohë që, sipas tyre, ish-prokurori duhet të mbahet nën konsultën e kardiologëve, shkruan report tv. Ish-prokurori akuzohet për korrupsion pasiv, pasi, sipas prokurorisë, ishte parapaguar me 29 mijë euro për të lehtësuar pozitën e vëllait të Aleks Shporit, i cili ndodhej nën gjykim për çështje droge. javanews/ a.k
