Gjykata e Krimeve të Rënda ka kritikuar Prokurorinë sot në lidhje me mënyrën e arrestimit të prokurorit Haxhi Giu, i akuzuar për korrupsion aktiv. Pak momente pasi doli lajmi për arrestimin e prokurorit, policia shpërndau edhe një video ku tregohej se si Giu ishte arrestuar nga efektivët e “Shqiponjës” në makinën e tij.
Por teksa avokati i Haxhi Giut sot gjatë seancës ku i është komunikuar masa e sigurisë “arrest me burg” prokurorit, ka bërë vërejtje duke thënë se mënyra që është filmuar gjatë arrestimit është e paligjshme, edhe gjykata i ka tërhequr vëmendjen organit të akuzës.
Sipas gjykatës, nuk është respektuar vendimi i datës 2 dhjetor, ku ishte vendosur që një oficer i Policisë Gjyqësore t’i komunikonte akuzën të pandehurit dhe jo një efektiv i Policisë së Tiranës. Vërejtje është tërhequr dhe për momentin e filmimit me kamera dhe shpërndarjen e këtyre pamjeve.
AKUZA
Giu akuzohet për korrupsion, pasi tentoi që në këmbim të 29 mijë eurove, të ndryshonte masën e sigurisë për një të akuzuar për trafik dhe prodhim narkotikësh. Sipas hetimeve, ishprokurori i çështjes së Azem Hajdarit, i mori 29 mijë euro vëllait të të akuzuarit në këmbim të ndryshimit të masës së sigurisë. Mirëpo, pasi dështoi në tentativën e tij, Giu ia ktheu mbrapsht paratë vëllait të të akuzuarit, ndërsa ky i fundit u dënua me 8 vjet burg./Panorama
