Kryetari i Gjykatës së Lartë, Xhezair Zaganjori, ka bërë të ditur se gjykatat përballen me një numër të madh dosjesh dhe vetëm në vitin 2015 kanë ardhur 9050 çështje të reja.
Sipas Zaganjorit situata në gjyqësor është problematike, ndaj thekson se Reforma në Drejtësi është e domosdoshme.
“Në një vit kemi marrë 7500 vendime. Në vitin 2015 kanë ardhur 9050 çështje të reja, dhe janë në pritje për gjykim dhe rreth 13 mijë dosje. Situata vijon të jetë problematike, ndaj reforma në drejtësi është e domosdoshme. Në gjykim kemi disa çështje pronash, kemi edhe disa kërkesa për pensione ushtarakësh”, tha Zaganjori në një takim me gazetarët.
I pyetur nga gazetarët mbi arsyet e vonesës së gjykimit të kësaj çështje e cila ndodhet në Gjykatë të Lartë që prej 5 vitesh, ai tha se dosja do të merret në shqyrtim shumë shpejt, por pa dhënë detaje mbi datën.
“Kemi marrë masa për dosjen, ka patur një ruajtje të veçantë në kasafortën e Gjykatës së Lartë. Mendoj që çështja do trajtohet shumë shpejt. Duhet të kemi parasysh ngarkesën e madhe që ka, është shumë voluminoze,” deklaroi Zaganjori duke shtuar se tashmë është gati relacioni dhe u është shpërndarë anëtarëve të Kolegjit Penal, të cilin ai vetë nuk e ka lexuar.
