Ndodh edhe kjo! Një fëmijë 2-vjeçar thirret në rolin e dëshmitarit nga Gjykata. Historia vjen nga Maqedonia, ku Gjykata e Kërçovës ka thirrur si dëshmitar vajzën e Arben Zendelit, i cili më 9 maj 2015 ka pasur një aksident trafiku. Në çastin e aksidentit në veturë ka qenë edhe vajza e tij dy vjeçare.
“Për fëmijën 2-vjeçar Gjykata e Kërçovës më ka lëshuar ftesë për t’u paraqitur në gjyq dhe për të deklaruar si ka ndodhur aksidenti. I bëj pyetje publike gjykatës, si do ta pranojë ftesën një fëmijë i cili nuk mund as të flasë, as të shkruajë dhe as të deklarojë”, tha Arben Zendeli.
Alsat kontaktoi me kryetarin e Gjykatës Themelore të Kërçovës, Baki Alili i cili tha se në këtë lëndë është bërë gabim teknik.
“Bëhet fjalë për lëndë penale. Gjykatëse e lëndës është Fluturije Dervishi. Arsyetimi është se është bërë gabim teknik në shkruarjen e thirrjes. Në vend që të lëshohet thirrje për fëmijën që është i dëmtuar dhe të jetë prezent me prindin është lëshuar thirrje sikur fëmija të jetë i akuzuar”, deklaroi Baki Alili, kryetar i Gjykatës Themelore në Kërçovë.
Megjithatë Arben Zendeli përgënjeshtron kreun e gjykatës. Zendeli thotë se ftesa i është adresuar dy herë.
“Më ka thënë avokati mos e merr vajzën. Unë as nuk e kam marr herën e parë as nuk e marr së dyti. Nesër jam në gjykatë dhe nuk do ta çoj, sepse nuk ka çfarë të deklarojë. Për të ardhur një ftesë e tillë, duhet personi ta pranoj vetë”, tha Zendeli.
Në ligjin për procedurë penale, Neni 213 thuhet se në rolin e dëshmitarit nuk mund të thirret personi i cili nuk është në gjendje të kuptoje rëndësinë e të drejtës së tij, raporton alsat-m.
