Gjykata e Shkallës së Parë e Juridiksionit të Përgjithshëm në Elbasan ka reaguar zyrtarisht lidhur me ndalimin e avokatit U.B. më 18 tetor, duke shprehur “keqardhje për shqetësimin e krijuar në opinionin publik dhe në komunitetin e avokatëve”.
Në deklaratën për shtyp, gjykata thekson se ndalimi i avokatit nuk është kryer në mjediset e saj dhe nuk lidhet me ndonjë vendimmarrje gjyqësore.
Më tej, theksohet se “prokuroria e ka vlerësuar këtë ndalim si të paligjshëm” dhe se gjykatës “nuk i është paraqitur asnjë kërkesë për shqyrtim mbi këtë ngjarje.”
Gjykata sqaron gjithashtu se më 17 tetor u zhvillua një seancë me dyer të mbyllura për vlerësimin e ligjshmërisë së arrestimit të 14 personave, ku avokati U.B ishte mbrojtës i një të mituri.
Ajo nënvizon rëndësinë e ruajtjes së privatësisë së të miturve dhe raportimit korrekt, duke shtuar se publikimi i pjesshëm i një regjistrimi nuk pasqyron domosdoshmërisht tërësinë e debatit procedural.
Në vijim, gjykata “dënon çdo formë ndërhyrjeje, presioni apo intimidimi ndaj aktorëve të drejtësisë” dhe rikujton rolin thelbësor të avokatëve si partnerë të drejtësisë dhe mbrojtës të të drejtave të qytetarëve.
Duke iu referuar standardeve të Gjykatës Evropiane për të Drejtat e Njeriut, përfshirë çështjen “Nikula kundër Finlandës”, deklarata nënvizon rëndësinë e lirisë së shprehjes së avokatëve gjatë ushtrimit të funksionit të tyre, si një element thelbësor i procesit të rregullt ligjor.
Në fund, Gjykata e Elbasanit siguron se çdo çështje do të trajtohet me paanësi dhe në përputhje me ligjin, duke ftuar mediat dhe institucionet të ruajnë komunikimin profesional dhe të matur në funksion të drejtësisë dhe interesit publik.
