Gjykata e Posaçme ka dënuar me 15 vite burg Domart Konjarin, të akuzuarin për veprat penale të “Trafikimi i narkotikëve”, “Pastrimi i produkteve te veprës penale ose veprimtarise kriminale”, “Organizata Kriminale”. Ai u dënua në mungesë pasi ndodhet në arrati.
Mirëpo nuk ka vonuar shumë dhe Konjari u ka dërguar letër nga arratia Ministrisë së Drejtësisë, Këshillit të Lartë Gjyqësor, Komisionit të Pavarur të Kualifikimit dhe Ambasadës së Francës në Tiranë. Ai pretendon se në Shqipëri po i shkelen të drejtat e tij.
Sipas tij dhe avokatëve të tij, të dënuarit po i cënohen të drejtat e se proçesi është i deformuar dhe dënimi është i padrejtë. Ai pretendon se procesi në ngarkim të tij është i deformuar, dhe se po i shkelen të drejtat në Shqipëri.
Në letër pretendohet se vendimi i dhënë nga Gjykata e Posaçme ishte i “paprecedent” dhe “ka minuar të drejtat themelore të njeriut”.
“Ambasada Franceze duhet të reagojë për këto shkelje të të drejtave themelore të njeriut në dëm të Z.Domart Konjari pasi Shteti Francez e ka pajisur me Statusin e Refugjatit këtë shtetas, dhe si rrjedhojë ka për detyrë ti ofrojë një mbrojtje në bazë të Konventave Ndërkombëtare të përmendur në këtë material”, shprehet Konjari në letrën e formuluar nga avokatët.
Dosja e tij është transferuar nga Franca për në Shqipëri dhe ndër të tjera ai akuzohet edhe për vrasjen e Devi Kasmit në vitin 2018.
Konjari u arrestua në nëntor 2015 për llogari të një urdhër-arresti të lëshuar nga autoritetet franceze të drejtësisë. Konjari u lirua nga qelia 5 muaj më vonë, pasi Apeli i Krimeve të Rënda zbuti masën e sigurisë nga “arrest në burg” në “detyrim për paraqitje”.
g.kosovari
