Gjuta njihet me akuzën në burg: Nuk kam lidhje me tritolin te Saimir Tahiri!
Vladimir Gjutës, të akuzuarit kryesor për tritolvënien në farmacinë e babait të ministrit të Brendshëm, i është komunikuar akuza në ambientet e paraburgimit, por ai nuk pranon asgjë.
Nga ana tjetër, akuza thotë se ka prova të mjaftueshme për të dhe për familjarët e tjerë si të implikuar në terrorin e 10 shkurtit, kur shpërthyen dy pako me tritol në farmacinë e Bashkim Tahirit. Gjuta akuzohet edhe si organizator i vendosjes së tritolit afër stacionit të autobusit, ku babai i Saimir Tahirit parkonte makinën. Në fakt për Vladimir Gjutën rëndon akuza e pjesëmarrjes në këto akte terroriste, ndërsa “mjeshtri i tritolit” ishte nipi i tij, Baftjar Bruka, i cili është arrestuar në Norvegji.
Prokuroria e Krimeve të Rënda i ka kërkuar drejtësisë norvegjeze që ta ekstradojë Brukën, pasi ai ishte shpallur në kërkim ndërkombëtar. I cilësuari si “djali me biçikletë”, Bruka mendohet se është personi që shfaqej në videon e shpërndarë nga policia, duke vendosur lëndën shpërthyese sipër kondicionerit të farmacisë së Bashkim Tahirit. Bruka u akuzua edhe për krijim celule terroriste në Itali, ndërsa Gjuta i dërgoi një sms Tahirit me tekst “mos u merr me familjen Gjuta”, kur ministri po takohej me oficerë italianë të antiterrorit.
Pjesa tjetër e familjes Gjuta, që u arrestua si e implikuar në këto ngjarje, ndodhet në burg. Vladimir Gjuta, 33 vjeç, kur u arrestua në tunelin e Kalimashit kishte vendosur paruke dhe ngjante si i vëllai. Ai është fejuar me vajzën e një doktori të njohur dhe ka në pronësi “vilën Gjuta” te Rruga e Elbasanit.
