Drejtori i Zyrës për Kosovën në Qeverinë e Serbisë, Marko Gjuriç ka thënë të mërkurën herët në mëngjes se pas më shumë se 18 orë bisedimesh me përfaqësuesit e Prishtinës në Bruksel, është arritur marrëveshje për kartat e identitetit, lëvizjen e kamionëve, vizitat zyrtare të serbëve në Kosovë si dhe zgjedhjet.
Duke theksuar se janë arritur marrëveshje të rëndësishme për popullin serb në Kosovë në katër fusha themelore, Gjuriç ka thënë për Tanjug se “letërnjoftimet e lëshuara nga Qeveria jonë lirisht mund të përdoren në Kosovë si dhe bisedimet për këtë çështje do të vazhdojnë edhe në të ardhmen”.
Zyrtari serb poashtu ka deklaruar se është arritur ujdi edhe për transportin e mallrave të rrezikshme dhe sipas tij, bllokada e kamionëve do të vlejë deri më 25 prill, transmeton zëri.info.
Sipas Gjuriçit edhe zgjedhjet serbe në Kosovë do të mbahen në të njëjtën formë sikurse ndodhi në vitin 2014 me praninë e OSBE-së.
Ndërkaq, sa i përket vizitave të zyrtarëve serb në vendin tonë, ai ka theksuar se janë marrë vesh që të mos iu ndalohet më hyrja atyre si dhe njoftoi se nesër do ta vizitojë Kosovën siç tha ai “në mënyrën më normale të mundshme”.
