Nga ARTUR AJAZI
Oratorët e opozitës, ç’nuk nxjerrin nga goja dhe shpirti i tyre. Nga jeta private deri tek hollësitë
biografike të kundërshtarit politik. Dhe kjo medemek, na qenkësh “opozita që kërkon pushtetin”. Si ka mundësi, ti gënjejë mëndja dhe imagjinata, dhe të mendojnë se, duke u futur deri në banesat dhe familjet e kundërshtarëve politikë, do të marrin votat e shumicës së shqiptarëve ? Tek i dëgjoj se si mbajnë me gojë dhe flasin idiotësi, më duket sikur kam para vehtes, ish-anëtarët e Këshillave Popullore të lagjeve që të bën “për 1 lek” kur kishin interest e tyre. Merreshin edhe me ty, edhe me prinderit, edhe me jetën private, edhe me pantallonat, flokët, dollapin e mbushur apo jo me ushqime, etj.
Fiks, këtë mënyrë llafollogjie po përdorin edhe komisarët e Berishës. Ç’nuk thonë për Edi Ramën, Erion Veliajn, Linda Ramën, Belinda Ballukun, Elisa Spiropalin, për ministrat e rinj dhe të vjetër, për deputetët dhe deri socialistët e thjeshtë. Merren me grate, burrat, fëmijët, banesat dhe kostumet e tyre. Merren me të dashurat apo bashkëjetueset e tyre, a thua se, jemi në vitin 1974 apo 1980. Padyshim atyre u ka mbetur ora në ato vite. Dhe nuk ndahen kollaj, ashtu siç nuk ndahet kollaj edhe lideri i tyre. Në rast se ke prova për afera korruptive, apo dhe lidhje të tjera kriminale dhe abuzive, nuk ka nevojë të vësh “tellallin”, por shko në organet e drejtësisë, denonco, dorëzo provat, faktet, dhe kaq. Merren ata pastaj me çdo shkelje ligjore, apo dhe vepër kriminale.
Por nuk duhet, dhe nuk të jep askush të drejtën ligjore të merresh mes sheshit dhe bulevardit, me jetën private dhe familjen e atij që e quan “kundërshtar politik”. Në PD-në e sot, Akoma jetojnë me citatet e Mao Ce Dunit, jetojnë akoma me mentalitetin kinez “demasko armikun e klasës, dhe atë që është kundër kryetarit Mao”. Gjuha e rrugës nga opozitarët e paeuropianizuar përdoret në Parlament, në komisione parlamentare, në protesta, në konferenca shtypi, në studio televizive, në biseda të përditshme, në komente politike, dhe ambiente të tjera.
Nuk po lënë njeri pa baltosur. Nuk po lënë deputet, minister, kryeminister, apo dhe zyrtarë të rrangjeve të tjera, pa baltosur, dhe nuk e dinë se, çdo akt i tillë, po u përkthehet në qindra e mijëra vota kundër, që do tu sjellë humbjen në 11 Maj. Në politikë, nuk ka vend për inate personale, pasi politika është “sheshi” ku ndeshen programet, alternativat, aftësitë, nga ku arrihen edhe bashkëpunimet historike në dobi të vendit dhe popullit.
Përdorimi i politikës për të përfituar të mira materiale, apo dhe benefite të tjera personale dhe familjare, tregon mungesë emancipimi, formimi, dhe vizioni për të shkuar më tej. Kjo ka ndodhur, dhe po ndodh në PD, ndaj dhe ajo parti gjendet fatkeqesisht në një krizë të rëndë, nga e cila nuk po del dot.
