Ministrja e Drejtësisë, Etilda Gjonaj ka deklaruar se pranimi zyrtarisht i Shqipërisë në Agjencinë e Bashkimit Evropian për bashkëpunim në Drejtësinë Penale, EUROJUST do të rrisë më tej besimin e ndërkombëtarëve tek vullneti i Shqipërisë për të luftuar krimin.
“Më lejoni të ndaj me ju një lajm pozitiv, atë të pranimit zyrtarisht në Agjencinë e Bashkimit Evropian për bashkëpunim në Drejtësinë Penale, EUROJUST. Ky pranim vjen pas një pune intensive të filluar me nënshkrimin e marrëveshjes në Tetor 2018 dhe të ratifikuar nga Kuvendi, mes Ministrisë së Drejtësisë dhe Agjencisë EUROJUST.
Përgjigjja pozitive është një notë vlerësuese e punës tonë. Përmes caktimit të shpejtë të një Prokurori në zyrën e EUROJUST në Hagë, do të rrisim më tej besimin e partnerëve tanë tek vullneti i Shqipërisë për të luftuar krimin ndërkufitar, do të garantojmë shkëmbimin në kohë të informacionit të nevojshëm në luftën kundër krimit të organizuar dhe më gjerë, si dhe me grupet e përbashkëta të hetimit me prokurorë të vendeve evropiane do të bëhet më efikase lufta kundër kriminalitetit,” u shpreh Gjonaj.
Në fjalën e saj në Kuvend, Gjonaj tha se të gjitha vendet europiane njohin rezultatet e Shqipërisë në reformën në drejtësi.
“Pavarësisht vendimit jo pozitiv të Këshillit Evropian për Shqipërinë dhe Maqedoninë e Veriut, të gjitha vendet evropiane njohin rezultatet e Shqipërisë në reformën në drejtësi.
Vlerësime vijnë edhe nga ato vende europiane që kanë një zë të fortë në procesin e vendimmarrjes së çeljes së negociatave, të cilat duhet të na ndihmojnë të ecim më tej në zbatimin e detyrave tona për t’u bërë pjesë e familjes europiane.
Puna jonë nuk ndalet, përkundrazi, ajo është intensifikuar edhe më shumë me ndihmën e shteteve evropiane dhe të organizmave ndërkombëtare që operojnë në fushën e drejtësisë për të përmbushur detyrat tona, detyra mjaft të rëndësishme për vetë fushën e punës tonë dhe reformës së rëndësishme, siç është Reforma në Drejtësi,” tha më tej ministrja Gjonaj.
/a.r
