Pas Tiranës, Festivali Jazz & Blues “Gjon Mili”, ka mbërritur në Korçë, duke përcjellë për turistët vendas dhe të huaj një atmosferë tejet të veçantë.
Për organizatorët, qyteti juglindor si vendlindja e fotografit me famë botërore dhe instrumentistit të obojës, mbart një përgjegjësi edhe më të madhe në promovimin e tij.
ANDI GONGO
MUZIKANT
“Ky festival synon të promovojë figurën e Gjon Milit si e vetmja urë lidhëse të periudhës më të artë të muzikës xhaz, në urën midis muzikës që kërcehej dhe asaj që dëgjohej në teatro.”
Ëndrra e Gjon Milit për muzikën Jazz & Blues ka qënë edhe shtysa kryesore e lindjes së këtij festivali i cili këtë vit ka edicionin e dytë.
ELONA ISLAMAJ
MODERATORE
“Kanë marrë pjesë rreth 25 muzikantë intsrumentisë shqiptarë dhe të huaj dhe prioritet i është dhënë shumë disa të rinjve. ky edicion rezultoi i suksesshëm dhe po hedh rrënjë të forta.”
Instrumentistët dhe muzikantët e huaj shprehen se kanë gjetur një hapësirë të larmishme të ndërthurjes së rrymave për muzikën moderne.
IDA ALTROVE
MUZIKANTE
“Jemi shumë të lumtur që jemi pjesë e këtij festivali, unë do të interpretoj disa këngë që i kam shkruar vetë. Kjo është hera e parë që vij në Shqipëri dhe kam gjetur një atmosferë të jashtëzakonshme.”
GIUSEPPE SANTELLI
MUZIKANT
“Në këtë festival kam sjellë një bashkëpunim trio që e kemi quajtur “ëndërrimtari”, kjo është hera e dytë që marr pjesë ndërsa reagimet kanë qënë shumë pozitive.”
Organizatorët shprehen se janë angazhuar gjithnjë e më shumë të rinjtë që promovojnë këtë lloj rryme duke e konsideruar muzikën jazz, në themel të të gjitha rrymave të tjera moderne.
/a.r
