Sasia prej 550 mijë eurosh që grupi i Emiljano Shullazit dyshohet se ka marrë nga biznesmeni Ylvi Beqja ka qenë një “rritje pazari”, raporton “Panorama”. Në dhjetor 2014, biznesmeni në cilësinë e administratorit të “Saudi Brothers”, i ka dhuruar Emiljano Shullazit “në shenjë mirënjohjeje” 749 metra katrorë truall brenda sipërfaqes ku ndodhet ish- hotel “Vollga”. Si rrjedhojë e kësaj kontrate, Emiljano Shullazi u bë kështu pronar i 20 për qind të objektit.
Por pas kësaj kontrate dhe depozitimit të saj në Hipotekën e Durrësit, sipas biznesmenit, Shullazi dhe njerëzit e tij kanë kërkuar më shumë. Më konkretisht, ata i kanë kërkuar Ylvi Beqajt rritjen e fitimit të Shullazit në 30 për qind të pronës. Pasi sipërmarrësi nuk ka pranuar, ai është përballur me kërcënime verbale e fizike për gati dy vjet.
Referuar dëshmisë së dhënë nga biznesmeni Ylvi Beqja, ai është detyruar të jepte 550 mijë euro në total, pasi nuk pranoi që të jepte 30 për qind të pronësisë së ish-hotel “Vollgës” në Durrës, raporton Panorama.
Organi i akuzës bën me dije se për realizimin e gjobëvënies ndaj biznesmenit, Emiljano Shullazi ka bashkëpunuar me shtetasit Gilmando Dani, Blerim Shullazi, Endrit Qyqja, Endrit Zela dhe disa persona të tjerë që janë në hetim. Nga ana tjetër, bëhet me dije se Ylvi Beqja ka dhënë rreth 400 mijë euro kesh dhe pasi ka parë se kërcënimet po vazhdonin, ka vendosur “të linte gjurmë”.
Për rrjedhojë, ai u ka thënë personave që e kërcënonin se nuk mund të tërhiqte më para nga bankat, por ka lëshuar çeqe me vlerë të përgjithshme rreth 150 mijë euro. Këto çeqe janë paraqitur në banka nga shtetasit Endrit Qyqja dhe Endrit Zela, të cilët më pas i kanë tërhequr shumat në banka, duke lënë edhe “gjurmët e krimit” të gjetura së fundi nga ana e Prokurorisë së Krimeve të Rënda.
Marrëveshja që biznesmeni Ylvi Beqja bëri me të akuzuarin, i ngarkonte Shullazit dy detyra: Marrjen e certifikatës së pronësisë në emër të “Saudi Brothers Commercial Company” nga Hipoteka Durrës dhe zgjidhjen e konfliktit të pronësisë mes kompanisë dhe shtetasit Zamir Hasa. Sipas marrëveshjes, nëse Shullazi i përmbush detyrimet e tij, do të shpërblehet me 20 për qind të vlerës së objektit.
“Në përmbushje të plotë të detyrimeve të marra përsipër prej tij në këtë kontratë, i porosituri do të përfitojë 20% të vlerës së objektit, të ndara në 10% për pikën 1 në vlerën e 700.000 eurove dhe 10% për realizimin e detyrimit të marrë përsipër nga i porosituri në pikën 2”, thuhet në kontratën mes palëve.
Kjo kontratë është sekuestruar nga Prokuroria në cilësinë e provës materiale, pas arrestimit të Emiljano Shullazit, Blerim Shullazit dhe Gilmando Danit disa muaj më parë. Shtetasit Endrit Qyqja dhe Endrit Zela ranë në pranga javën e kaluar, pak ditë pasi Prokuroria firmosi marrëveshjen e bashkëpunimit me biznesmenin Ylvi Beqja, që ka marrë statusin e dëshmitarit dhe është marrë në mbrojtje nga drejtësia.
ma.me
