Gjykata kundër Korrupsionit dhe Krimit të Organizuar (GJKKO) ka lënë në masën e sigurisë “arrest me burg” Fredi Belerin dhe Pandeli Kokaveshin, duke pranuar kështu kërkesën e SPAK për qëndrimin pas hekurave të kreut të sapozgjedhur të Bashkisë së Himarës dhe mikut të tij të ngushtë.
Masa e sigurisë për Kokaveshin është dhënë në mungesë, pasi ai ndodhet i shtruar në spital, pasi që pas arrestimit ka pasur komplikacione shëndetësore.
Fredi Beleri, kandidati i koalicionit “Bashkë fitojmë”, në zgjedhjet e 14 majit, u arrestua në minutat e para të 12 majit, për akuzën e “korrupsionit aktiv në zgjedhje”. Sipas Prokurorisë së Vlorës, Beleri ka dhënë dhe i ka premtuar shuma monetare personave të ndryshëm, me qëllim blerjen e votës.
Akuza ndaj tij u mbështet në disa filmime dhe përgjime mes tij dhe një të infiltruari, të cilit iu premtuan 400 mijë lekë të vjetër për 8 vota. Avokati i Belerit pretendoi se akuzat ndaj klientit të tij janë të montuara dhe të motivuara politikisht.
/a.r
