Gjykata Kushtetuese ka vendosur sot t’i japë të drejtë Erion Veliajt, duke rrëzuar vendimin e Këshillit të Ministrave, i cili më 25 shtator 2025 shkarkoi ish-kryebashkiakun nga detyra. Ky vendim e konfirmon zyrtarisht rikthimin e Veliajt në postin e Kryetarit të Bashkisë së Tiranës, pavarësisht qëndrimit të tij nën masën e “arrestit me burg” që nga 10 shkurti 2025 dhe akuzave të SPAK-ut.
Vendimi i Kushtetueses, i marrë pas ankimimit të Veliajt më 29 shtator, shfuqizon jo vetëm aktin e Qeverisë, por teorikisht anulon edhe dekretin e Presidentit Begaj për shpalljen e zgjedhjeve të reja.
Menjëherë pas vendimit, ka ardhur reagimi i Këshilltarit të Partisë Demokratike në Këshillin Bashkiak të Tiranës, Erion Teliti. Ai nuk e shikon vendimin si një fitore të Veliajt, por si një pasojë të drejtpërdrejtë të gabimeve dhe mungesave procedurale të bëra nga mazhoranca socialiste.
“Vendimi i Gjykatës Kushtetuese në lidhje me çështjen Veliaj është pasojë e drejtpërdrejtë e qëndrimit të mazhorancës, e cila refuzoi kërkesën tonë për të pasuruar vendimin e shkarkimit nga Këshilli Bashkiak me shkeljet reale të shumta të kryera nga kryetari i bashkisë, si dhe për t’i garantuar atij të drejtën kushtetuese të mbrojtjes para Këshillit Bashkiak.”, shkruan Teliti në Facebook.
Sipas Telitit, PD kishte kërkuar që vendimi i shkarkimit (më 23 shtator 2025) të mos bazohej vetëm në nenin 62 (mosparaqitja për 3 muaj), por të përfshinte edhe shkeljet e shumta reale të akuzave të SPAK-ut. Refuzimi i kësaj kërkese dhe mosgarantimi i së drejtës së mbrojtjes nga Këshilli Bashkiak, duket se kanë krijuar baza ligjore të dobëta, të cilat u shfrytëzuan nga mbrojtja e Veliajt në Kushtetuese.
Këshilltari i PD-së, Teliti, ka paralajmëruar se betejat politike dhe ligjore nuk kanë përfunduar: “Ne do të vazhdojmë të kërkojmë transparencë dhe përgjegjësi, ne do vazhdojmë betejën për Tiranën kurdo qofshin zgjedhjet.”
