Nëpërmes organizimit të Javës së Filmit të Bekim Fehmiut festivali “Mirëdita dobar dan” do të shtrihet në periudhën 6 – 10 tetor, në dy qytete me rëndësi memoriale në jetën e Bekim Fehmiut, përkatësisht në Prishtinë dhe Prizren. Në Kino ABC në Prishtinë, më 6 tetor 2015 në 19:30 hapet kjo ngjarje ku do të shfaqet edhe filmi “Mbledhësit e Puplave”, ndër të tjera i shpërblyer me Grand Pri në Festivalin e Kanës më 1967. Ndërsa shfaqja e filmave të tjerë do të vazhdojnë në bazë të orarit të planifikuar në Kino ABC and Dokukino.
Qytetarët e Kosovës do të kenë mundësi të shijojnë pesë filma nga krijimtaria kinematografike e aktorit Bekim Fehmiu. Në Kino ABC në Prishtinë shfaqen “Mbledhësit e Puplave” më 6 tetor, “Gethi i Gjerë” më 7 tetor dhe filmi “Era”, më 8 tetor kurse në DokuKino në Prizren shfaqen filmat “Edukimi Special” dhe “Kurthi për Gjeneralin” më 9 dhe më 10 tetor.
Festivali “Mirëdita, dobar dan” është iniciativë unike që kontribuon në dialogun dhe shkëmbimin kulturor në mes Kosovës dhe Serbisë, më qëllim të përmirësimit të marrëdhënieve sociale, politike dhe kulturore në mes dy shoqërive. Synimi i organizatorëve është që ky festival të vazhdojë të organizohet në mënyrë tradicionale, duke kontribuar në vazhdimësi në vendosjen e paqes së përhershme dhe normalizimin e marrëdhënieve mes Kosovës dhe Serbisë.
Projekti “Mirëdita, dobar dan” implementimet nga Integra, Iniciativat Qytetare, Qendra për Politikë në bashkëpunim me KFOS dhe forumZFD.
