Partia Socialiste ka marrë shumicën dërmuese të mandateve në qarkun e Gjirokastrës, ndërsa numërimi ka përfunduar edhe për votat preferenciale për kandidatët.
Në të 7 KZAZ-të e Qarkut Gjirokastër ka përfunduar procesi i numërimit të votave preferenciale, ku KZAZ nr. 81, në Bashkinë e Gjirokastrës, ishte e fundit që e mbylli këtë proces.
Nga rezultatet PS ka marrë 3 mandate, ku në Kuvend do të hyjnë Mirela Kumbaro që është në listë të mbyllur si drejtuesja politike e qarkut, dhe dy deputetët nga vota preferenciale Termet Peçi me 9,468 vota dhe Pirro Dhima me 6,902 vota. Ndërsa Partia Demokratike ka marrë një mandat, që kualifikon Tritan Shehun nga lista e mbyllur.
Në një intervistë për RTSH, Pirro Dhima ka shprehur falënderimet për mbështetjen e marrë nga qytetarët për të qenë deputet.
“Falënderoj banorët e qarkut Gjirokastër, të gjithë komisionarët falënderoj PS dhe strukturat e partisë. Të gjithë këtë besim të dhënë do e kthej me punë dhe përkushtim për Gjirokastrën”, tha Dhima.
Zgjedhjet e 11 majit në Qarkun e Gjirokastrës u zhvilluan në mënyrë të qetë dhe pa probleme. Në këtë qark, Partia Socialiste ka marrë 24,457 vota, ose 62.23% në rang qarku, ndërsa Partia Demokratike 11,596 vota, ose 29.51%.
Statistikat e KQZ, votat preferenciale për PS:
Termet Peçi – 9,468 vota, merr mandatin e deputetit
Pirro Dhima – 6,902 vota, merr mandatin e deputetit
Anila Dhimitri – 3,292 vota
Shyqyri Hysi – 2,371 vota
Votat preferenciale për Partinë Demokratike:
Alma Kore – 3,569 vota
Arben Ristani – 2,881 vota
Mariklen Dervishi – 2,001 vota
Bajram Hysa – 1,499 vota
