Kryetari i Partisë Socialdemokrate, Skënder Gjinushi, ka komentuar çështjen e dekriminalizimit duke u bërë thirrje krerëve të politikës dhe institucioneve të rendit që të nisin ndëshkimin e të ashtuquajturve “peshq të mëdhenj”. Në një intervistë për gazetën “Sot”, Gjinushi shprehet se problemi në Shqipëri nuk janë katapultimi i të dënuarve në Parlament, por të pandëshkuarit e mëdhenj. Për Gjinushin drejtësia në Shqipëri nis duke prekur vatrën dhe kokën e saj. Sipas tij, vatra dhe koka e korrupsionit në Shqipëri janë Sali Berisha dhe Lulzim Basha.
Gjinushi ka shtuar se Sali Berisha ka arritur ta ulë shënjestrën e amerikanëve pas gjithë atyre krimeve njerëzore dhe ekonomike. Sipas tij, mbijetesa e të padënuarve në krye të politikës shqiptare bën që të vegjetojnë të pandëshkuarit edhe në nivele më të ulëta.
Rezistoi Saliu në ’96, ’97, ’98, mbijetoi dhe u riciklua. Bëri ç’bëri Luli me Saliun në 21 Janar, kërkoi të merrte Tiranën. Me vrasje të zbardhur dhe pa u ndëshkuar, Luli kërkoi të fitonte Tiranën. Dhe kur nuk fiton, vjedh dhe votat. Po nuk arritëm të ndëshkojmë krimin, korrupsionin apo abuzimin, atëherë bëjmë një ligj për të ndëshkuar të pandëshkuarin. Pra, në Shqipëri problem qenkan të dënuarit dhe jo të padënuarit! Të implikuarit e politikës dhe përgjegjësit e gjëmave kryesore që kanë ndodhur në Shqipëri, duke nisur nga piramidat e ’96 dhe vjedhja e votës, kanë arritur që t’ia ulin shënjestrën SHBA dhe BE. Nuk është problemi a u dënuan disa ish ministra apo kryeministra, por problemi këtu është se kur dënohet një ish ministër apo një ish kryeministër nuk ka më imunitet për të tjerët.” thekson Gjinushi
