Ish-ministri Damian Gjiknuri ka komentuar përgjimet e Dibrës teksa shpjegoi edhe telefonatat e tij. Në studion e emisionit “JAVA në RTSH”, Gjiknuri kërkoi ndjesë për fjalët e pahijshme të përdorura prej tij, por shtoi se ajo ishte një telefonatë private me mbështetësit e PS.
“Në telefonatat e publikuara nuk ka asgjë të paligjshme nga ana ime. Unë kërkoj ndjesë për ndonjë fjalë të pahijshme. Sa i përket metaforës ‘tërmet’ ajo i referohet fitores në një bastion të djathtë siç ishte Dibra” – tha Damian Gjiknuri.
Në studion e emisionit “Java në RTSH” ai shtoi se në komunikimet e tij ai nuk shprehet as për blerje votash dhe as për ndonjë krim elektoral.
“Ajo ishte një situatë në një ngjarje politike të jashtëzakonshme për shkak të një fushate shumë të mirë. E gjithë Partia Demokratike u instalua në Dibër në atë kohë dhe kishte një tension shumë të madh” – tha ai.
Hapja e hetimeve vetëm me një kallzim të PD-së, sipas tij, tregon qartë një mungesë serioziteti nga ana e autoriteteve.
Gjiknuri shkoi edhe më tej. Ai tha se sipas informacioneve që zotëron, përgjimet ishin një koordinim mes Partisë Demokratike, Prokurorisë dhe Shërbimit Informativ Shtetëror.
“Akuza u bë për krim të organizuar vetëm që të përdoreshin instrumentet politikë në Prokurori. Asnjë kundërshtar i yni nuk është përgjuar në fushatë, por janë përgjuar mbi 40 numra të njerëzve të PS-së” – tha ai në emisionin “Java në RTSH”.
