Ministria e Energjisë ka bërë gati ligjin pёr nxitjen e pёrdorimit tё energjisё nga burimet e rinovueshme, i cili pritet të shqyrtohet në seancën e radhës parlamentare. Ligji i ri do të vendosë si objektiv që 38% e energjisë së përdorur në vend të vijë nga burimet e rinovueshme deri në vitin 2020. Ligji do të japë mundësi edhe operatorëve privatë të investojnë në instalimin e sistemeve të prodhimit të energjisë.
Komisioni për Veprimtaritë Prodhuese i hapi rrugë për në seancën plenare ligjit pёr nxitjen e pёrdorimit tё energjisё nga burimet e rinovueshme.
Në prezantimin e ligjit, Ministri i Industrisë dhe Energjisë, Damian Gjiknuri tha se ky ligj do t’i japë një zhvillim të konsiderueshëm sektorit turistik pasi do të shfrytëzojë resurset natyrore të Shqipërisë, si dielli apo burimet ujore, shkruan “ora”.
Damian Gjiknuri: Ligji parashikon vendosjen e objektivave kombëtarë të detyrueshëm për energjinë e rinovueshme, pra që Shqipëria do të kapë një kuotë të caktuar që është në përputhje me angazhimet që ka marrë dhe objektivi kombëtar është 38% e energjisë deri në vitin 2020.
Sipas Ministrit Gjiknuri, ligji i mundëson të gjithë operatorët privatë të instalojnë sisteme të prodhimit të energjisë së rinovueshme.
Ata do të kenë mundësi përveç përdorimit, edhe ta hedhin në treg për ta shitur energjinë e prodhuar.
