Kompanitë teknologjike amerikane, si ‘Google’, ‘Twitter’ dhe ‘Facebook’, janë kërcënuar nga agjencia ruse Roskomnadzor.
Kjo e fundit është nje kompani që merret me mbikëqyrjen e mediave, për shkelje të ligjeve të këtij shteti në lidhje me internetin. “The Guardian” raporton se, agjencia u ka dërguar kompanive një letër, ku u kërkon që të zbatojnë ligjet.
“Në letrën tonë ne i rikujtojmë kompanive për pasojat që sjell shkelja e legjislacionit,” deklaroi zëdhënësi i agjencisë, Vadim Ampelonsky. Ai tha gjithashtu se qeveria ruse do të bllokojë qasjen në shërbimet që ofrojnë këto kompani, nëse ata nuk do t’i binden disa rregullave që kjo kompani kërcënuese ka vendosur për te ndjekur si rrugë ligjore.
Në fakt gjatë muajit maj, Rusia miratoi një ligj, i quajtur “Bloggers Law”, ku thotë se çdo sajt me më shumë se 3 mijë vizitorë në ditë do të konsiderohet si një burim informacioni dhe do të jetë përgjegjëse për vërtetësinë e lajmeve që publikon. Kështu, për të zbatuar këtë ligj, kompanive si ‘Google’, ‘Twitter’ dhe ‘Facebook’ iu është kërkuar që të dorëzojnë të dhëna në lidhje me këto uebsajte tek qeveria ruse.
