“Gjetëm trenin nazist plot me flori”
Ky njoftim i bërë nga disa persona të panjohur nga qyteti i Valbrich në Poloninë perëndimore, ka shkaktuar bujë në media. Fjala është për një varg vagonësh të mbetur në një galeri nëntokësore, ku thuhet se ka sasi të mëdha floriri. “Ne kemi marrë një letër nga një zyrë avokatie që përfaqëson dy persona që deklarojnë se kanë identifikuar vendin ku ndodhet një varg vagonësh të një treni, që mendohet të jetë i blinduar”, theksoi Arkadiusz Grudzien, zëdhënës i Bashkisë së Valbrich. “Teksti nuk përmban asnjë të dhënë për vendin e saktë të zbulimit. Dy personat kanë kërkuar të na takojnë”, theksoi Grudzien. “Bëhet fjalë për një gjerman dhe një polak”, sipas avokatit që përfaqëson autorët e zbulimit të dyshuar.
Autoritetet thonë se po punojnë për të verifikuar vërtetësinë e lajmeve rreth trenit në fjalë, ndërkohë që personat që dhanë lajmin kanë komunikuar se pretendojnë gjysmën e vlerës së thesarit të gjetur.
