Performanca e Shqipërisë në Eurovision nuk ka kaluar pa incidente. Gazetari Albert Limani ka ndarë një video nga prapaskena në rrjetet sociale gjatë momentit kur Alis po performonte në skenë dhe në Qendrën e Mediave dhe delegacioni shqiptar po brohoriste për të.
Në duart e tyre gjendeshin flamujt e Shqipërisë e Kosovës, por aty ka ndodhur diçka e papritur. Limani shkruan krah videos se një grua nga delegacioni i Serbisë është përpjekur ta largojë flamurin e Kosovës duke thënë se “nuk lejohet.”
“Derisa po festonim bashkë me kolegë të tjerë paraqitjen e Shqipërisë në Eurovision, në Qendrën e Mediave në Vjenë, një grua nga delegacioni i Serbisë erdhi dhe tentoi të na e heqë flamurin e Kosovës, duke na thënë se “ky flamur nuk lejohet këtu”.
Sigurisht, ajo tentoi ta prekë, por nuk e lejova dhe u kthye mbrapsht.
Flamuri i Kosovës do të valojë dhe do të lejohet gjithkund, ndërsa ne do ta mbrojmë me çdo kusht”, shkruan Limani.
