Ministrja e Zhvillimit Urban, Eglantina Gjermeni zhvilloi sot në qytetin e Elbasanit së bashku me Kryetarin e Bashkisë, Qazim Sejdini dhe Prefektin, Arben Kamami, inspektimin e punimeve të katër projekteve të financuara nga Fondi i Zhvillimit të Rajoneve dhe projektit të financuar nga fondet e Ministrisë së Zhvillimit Urban, për Përmirësimin e kushteve të jetesës për komunitetin Rom dhe Egjiptian.
Për vitin 2015, nga Fondi i Zhvillimit të Rajoneve për Bashkinë Elbasan u investuan në total rreth dyqind e tridhjetë e katër milionë lekë, për zbatimin e katër projekteve, të cilat tashmë kanë përfunduar duke i dhënë një fizionomi bashkëkohore qytetit dhe në shërbim të qytetarëve.
Projektet e financuara janë sistemim i rrugës “Marie Dhama” dhe sheshet e pallateve, suvatim dhe lyerje fasadash në rrugët kryesore për 100 banesa kolektive, sistemim asfaltim i rrugës te pallati i sportit, sistemim asfaltim bllokut të banimit, sheshet e pallateve 60,61,62,63/1,64,64/2,64/3, rruga “Nusret Kokobobo”.
Në fjalën e saj Ministrja Gjermeni, vlerësoi punën e bërë dhe angazhimin e të gjithë stafit të Bashkisë Elbasan, në zbatimin me cilësi dhe brenda afateve, të projekteve të financuara nga Qeveria Shqiptare.
“Bashkia e Elbasanit është një bashki model në aplikimin dhe zbatimin e projekteve që ne inspektuam sot si dhe projekteve të tjera të financuara përgjatë vitit 2014. Projektet e zbatuara, qoftë në përmirësimin e infrastrukturës së rrugëve të brendshme të qytetit, projekti i fasadave të 100 banesave kolektive dhe projektet për krijimin e hapësirave publike funksionale e kanë ndryshuar fizionominë e qytetit të Elbasanit, duke i shërbyer qytetarëve dhe duke i dhënë një pamje atraktive qytetit të Elbasanit”, tha Gjermeni.
Gjithashtu më vjen mirë të them, nënvizoi Ministrja Gjermeni, “se edhe projekti i financuar nga buxheti i Ministrisë së Zhvillimit Urban, në vlerën rreth njëzet e katër milionë lekë, në kuadër të programit të infrastrukturës për Përmirësimin e Kushteve të jetetës për komunitetin Rom dhe Egjiptian, falë të cilit janë rehabilituar banesat për rreth 35 familje të këtij komuniteti, ka përfunduar me sukses”
Me fondin e alokuar janë kryer edhe ndërhyrje në rrugën kryesore, ku jeton ky komunitet ku nga asfaltimi dhe punimet e kryera në rrugë përfitojnë rreth 60 familje të këtij komuniteti.
Në fund fjalës së saj Ministrja Gjermeni, shprehu angazhimin e Qeverisë në mbështetje të bashkive të reja me reformën territoriale, duke theksuar se Bashkia Elbasan është dhe një nga pesë bashkitë e përzgjedhura nga programi i USAID PLGP, në kuadër të ofrimit të asistencës teknike dhe financiare për hartimin e Planeve të Përgjithshme Vendore, duke e çuar kështu në 31, numrin e bashkive që brenda vitit 2016 do të kenë të hartuar dhe miratuar Planet e tyre të Përgjithshme Vendore.
Ky plan do të përcaktojë një zhvillim më të mirë të zonës, duke përdorur potencialet ekonomike dhe natyrore, dhe duke i dhënë një zhvillim ekonomik asaj.
