Ministria e Zhvillimit Urban, në bashkëpunim me AKSHI-n dhe kompaninë zbatuese të projektit, është duke punuar në mënyrë intensive, për trajnimin e bashkive, projektuesve dhe investitorëve që pas 1 shtatorit, çdo aplikim për leje ndërtimi do të kryhet vetëm nëpërmjet sistemit online.
Ministrja e Zhvillimit Urban, Eglantina Gjermeni, ndoqi një prej seancave të trajnimit të stafeve të disa prej bashkive në vend. “Ne monitorojmë procesin e aplikimit të lejeve dhe unë marr çdo javë një raportim të plotë për çdo bashki. Vë re që pak aplikime janë bërë online. Skepticizmi, për një proces që deri dje është bërë me letra në dorë, mund të jetë një prej arsyeve. Por, unë dua të nënvizoj fort përgjegjësinë, që stafet e bashkive ku punoni, kanë për kthimin e përgjigjes në kohën e duhur apo për miratimin në heshtje të lejeve të ndërtimit. Dhe së dyti, procesi i dixhitalizimit duhet ta lehtësojë procedurën, në mënyrë që në çdo moment qytetarët apo investitorët të dinë statusin e aplikimit të tyre”, tha ministrja Gjermeni.
Sistemi elektronik i lejeve të ndërtimit është i aksesueshëm përmes regjistrimit në portalin e-albania, që përmbledh dhe ofron të gjitha shërbimet publike elektronike, në një platformë të vetme online. Pra, qytetarët nuk do të mund të sorollaten më për dokumentacion apo lista me dokumente, që kërkohen për një leje ndërtimi, theksoi ajo. (java / r.a)
