Kabineti gjerman pritet të diskutojë sot një reformë të shërbimeve të inteligjencës, e cila parashikon zgjerimin e ndjeshëm të kompetencave të tyre dhe krijimin e mundësive të reja për ndërhyrje.
Ministri i Brendshëm, Alexander Dobrindt, do të prezantojë në kabinet projektin për reformimin e Zyrës Federale për Mbrojtjen e Kushtetutës.
Sipas të përditshmes “Bild”, reforma synon ta shndërrojë këtë institucion në një shërbim inteligjence me kompetenca më të gjera operative.
Deri tani, Zyra për Mbrojtjen e Kushtetutës ka pasur kryesisht rol në mbledhjen dhe analizimin e informacionit, ndërsa ndërhyrjet operative kanë qenë përgjegjësi e policisë dhe institucioneve të tjera të sigurisë.
“Situata e kërcënimeve hibride, përpjekjet për destabilizim përmes sabotazhit, spiunazhit, sulmeve kibernetike dhe operacioneve të fshehta nga fuqitë e huaja kërkojnë një përgjigje të re. Ne po i transformojmë shërbimet tona të inteligjencës në shërbime të mirëfillta sekrete”, deklaroi Dobrindt.
Projektligji i ri do t’i jepte zyrës mundësinë të ndërhynte për të penguar operacionet në vazhdim të terroristëve, diversantëve apo agjentëve të huaj.
Gjithashtu, parashikohet që ajo të mund të ridrejtojë trafikun e të dhënave dhe të ndërhyjë në mënyrë të targetuar në sisteme teknologjike.
Në raste të caktuara, autoritetet do të mund të autorizonin edhe neutralizimin e mjeteve të përdorura për sulme, përfshirë zëvendësimin e bombave të destinuara për atentate me kopje të padëmshme dhe jofunksionale.
