Qeveria gjermane dhe Policia Federale i kanë dhuruar sot një paketë ndihmash Policisë Shqiptare, për të ndërhyrë dhe dhënë ndihmën e parë në raste katastrofash natyrore.
Në ceremoninë e zhvilluar me këtë rast, ministri i Brendshëm Sandër Lleshaj falënderoi shtetin gjerman dhe diplomatët e Ambasadës gjermane për ndihmën e ofruar në rastet e emergjencave civile, dhuruar për forcat e FNSH, në Policinë e Shtetit.
Në ceremoninë e zhvilluar për dorëzimin e donacioneve ishte i pranishëm Ambasadori i Gjermanisë në Tiranë, zyrtarë të lartë të Policisë, diplomatë e forca policore. Ambasadori Zingraf theksoi edhe njëherë mbështetjen e Gjermanisë në rrugën e Shqipërisë drejt BE.
“Dëshiroj të falënderoj përzemërsisht edhe partnerët tanë shqiptarë, Policinë Shqiptare, Ministrinë e Brendshme, që mundësuan zhvillimin e të gjitha procedurave në mënyrë optimale, lidhur me këtë paketë ndihmash, çka hedh një dritë të mirë edhe në marrëdhënien tonë të shkëlqyer të bashkëpunimit. Gjermania dhe Policia Federale gjermane do të vazhdojnë të mbështesin Shqipërinë sikurse deri më tani në rrugën e vet drejt integrimit europian”, u shpreh ambasadori Zingraf.
Kjo paketë ndihmash përbëhet prej gjeneratorësh elektrikë, pompa uji, sendesh e pajisje të tjera, që janë të nevojshme në raste akute të emergjencës, përmbytje, tërmete ose katastrofa të tjera natyrore. /e.s/
