Ministri i Shtetit për Europën në Gjermani, Michael Roth ka rikonfirmuar se Gjermania do t’i japë një dritë jeshile Shqipërisë dhe Maqedonisë për çeljen e negociatave.
Roth ka shprehur vlerësimet për përpjekjet e Shqipërisë mbi sundimin e ligjit, pavarësinë e gjyqësorit dhe luftën kundër korrupsionit.
Ai ftoi Hollandën dhe Francën që t’i bashkohen Gjermanisë në mbështetjen për dy vendet e Ballkanit Perëndimor. I pyetur nëse mendonte që Hollanda dhe Gjermania do të jepnin sot një vendim pozitiv, ministri tha se mbetet optimist për këtë.
“Stabiliteti, paqja dhe demokracia luajnë një rol thelbësor për të gjithë ne në BE . Ja pse unë vlerësoj shumë përpjekjet që të dyja vendet kanë ndërmarrë për të forcuar sundimin e ligjit, pavarësinë e gjyqësorit, luftën kundër korrupsionit. Gjermania është gati, qeveria gjermane është gati të mbështesë Shqipërinë dhe Maqedoninë në rrugën e tyre drejt BE. Ne jemi gati të dërgojmë dritën jeshile dhe do të inkurajoja miqtë tanë, Francën Hollandën që të na bashkohen. Mbetem optimist se do ta bëjnë këtë”, tha Roth.
Ministri i jashtëm holandez Stef Blok vlerësoi progresin e Shqipërisë, por kërkoi rezultate konkrete
“Dy vendet kanë bërë progres por jo mjaftueshëm, duhen rezultate konkrete mbi korrupsionin. E rëndësishme është që të dy vendet kanë treguar këmbëngulje në luftën kundër korrupsionit por duhet të shohim më shumë. Shtyhen në dhjetor? Nuk e di, ne duhet të shikojmë progres të mjaftueshëm. Në një anë ne mbështesim progresin që kanë bërë por nuk mund të injorojmë faktin që duhet të shohim rezultate konkrete”, tha Blok
/a.ç
