“Gjermania nuk do të ndjekë Francën dhe nuk do të mbajë zgjedhje të parakohshme pavarësisht performancës së zymtë të koalicionit qeverisës në zgjedhjet e BE-së”, u shpreh të hënën zëdhënës i kancelarit Olaf Scholz, Steffen Hebestreit.
Në një konferencë shtypi të qeverisë, ai tha: “Data e rregullt e zgjedhjeve është në vjeshtën e ardhshme. Dhe kjo është ajo që ne planifikojmë të bëjmë”.
Koalicioni i Scholz pësoi humbje të mëdha në zgjedhjet evropiane, me të tre partitë në qeverinë e tij që pasojnë konservatorët dhe të djathtën ekstreme, treguan rezultatet paraprake.
Social Demokratët e kancelarit (SPD) shënuan rezultatin e tyre më të keq në histori me 14%, të tretat pas AFD-së së ekstremit të djathtë me rreth 16% dhe shumë pas bllokut konservator CDU-CSU me 30%. Të Gjelbrit shënuan 12%, ndërsa FDP liberale 5%.
Rezultati nxiti thirrje nga partitë opozitare që Scholz të ndiqte shembullin e Emmanuel Macron dhe të thërriste zgjedhje të parakohshme./m.j
