Numri i shtetasve turq, të cilët kërkuan azil në Gjermani gjatë gjashtë muajve të parë të vitit 2016 ka shënuar rritje, ndërkohë që shumica e tyre ishin pjesëtarë të pakicës kurde të vendit, shkruan sot gazeta gjermane “Tagesspiegel” duke cituar Zyrën për Migrim dhe Refugjatë (BAMF).
“Një total prej 1,719 kërkesave për azil janë paraqitur nga shtetasit turq gjatë gjashtë muajve të parë të vitit 2016, pothuajse aq sa aplikimet e dorëzuara gjatë gjithë vitit 2015-të”, thuhet në raport.
“Por, rreth 88 për qind e kërkesave për azil, ose 1,510 aplikime, janë nga shtetasit me origjinë kurde”, shprehet një zëdhënës i BAMF-it për “Tagesspiegel” duke shtuar se shumë prej tyre të regjistruar në Gjermani kishin ikur nga rajonet me shumicë kurde, në juglindje të Turqisë.
Turqia Juglindore ka parë dhunën më të rëndë në 20 vjet që kur Partia e Punëtorëve të Kurdistanit (PKK) shkeli armëpushimin dyvjeçar me qeverinë, në korrik të 2015-ës.
Ankaraja është duke kryer një spastrim të paprecedentë të të dyshuarve pas një grushti shteti të dështuar, më 15 korrik.
BAMF-ja nuk mund të thotë nëse përpjekja e grushtit të shtetit dhe pasojat e saj po ndikojnë në numrin e njerëzve që ikin nga vendi për Gjermani.
