Të ardhurat e ulëta nga shitja e naftës, sanksionet, probleme strukturore dhe rezervat që janë duke u harxhuar, tregojnë se Rusia është në krizë ekonomike. Ekonomia gjatë vitit të kaluar u tkurr me 3.8 për qind, ndërsa Banka Botërore për këtë vit pret rënie prej 1.9 për qind.
Në të njëjtën kohë, vendi ka shumë probleme tjera. Për shembull, çmimi i naftës në dy vitet e fundit është përgjysmuar, ndërsa kompanitë shtetërore dhe të naftës po kanë shumë më pak para.
“Me një çmim të tillë të ulët të naftës dhe të gazit natyror, është e vështirë për të financuar buxhetin”, ka thënë Stefan Meister, ekspert për Rusinë nga Shoqata Gjermane për Politikën e Jashtme. “Qeveria mund të arnojë vrimat në buxhet vetëm nëse merr para nga rezervat e shtetit”.
Sanksionet perëndimore, të cilat ishin një reagim ndaj aneksimit të Krimesë dhe ndaj konfliktit në Ukrainë, ndikojnë po ashtu në këtë. Tregtia është pezulluar e kjo pengon edhe financimin e investimeve, transmeton Telegrafi.
“Sanksionet perëndimore u kanë pamundësuar bankave dhe firmave tona të marrin hua jashtë, jo vetëm në Evropë, po në tërë botën”, ka thënë Vladimir Milov, lideri i partisë opozitare Zgjedhja Demokratike dhe drejtor i Institutit për Politika Energjetike. “Askush nuk na huazon para, madje as Kina”.
Kreditë në dhjetë vitet e fundit kanë qenë baza e rritjes ekonomike ruse. Sanksionet e kanë zvogëluar vëllimin e kredisë nga 700 në 470 miliardë dollarë amerikanë.
Kjo humbje e madhe e kapitalit ka bërë që rubla të zbrese përgjysmë në raport me dollarin.
Ndër problemet tjera në Rusi janë edhe ato strukturore: në ekonomi sundojnë disa sipërmarrës të mëdhenj që ndërlidhen me politikën, në vend nuk ka konkurrencë e as shtet ligjor.
