Disa ditë më parë gjykata e Tiranës vendosi të lërë në qeli të fortin e Myslym Shyrit, Gjergj Cukalin. Ai dyshohet se ka urdhëruar atentatin e mbetur në tentative ndaj Gjon Menës, ngjarje e ndodhur me 9 Shkurt në Kamëz. 42 vjeçari do të bëjë ankim në Apel, duke kërkuar lirinë.
Klan News ka mësuar se mbrojtja do të konsistojë tek fakti se deklarimet e Enver Jakimi një tjetër i arrestuar për këtë ngjarje, nuk janë të mbështetura në prova shkencore dhe shkresore. Mbrojtja kërkon që Apeli të mos i marrë për bazë deklarimet e Jakimit. Gjithashtu në ankim theksohet se grupi hetimor ka bërë kualifikim të gabuar të veprës penale. Cukali akuzohet për “Vrasje me paramendim e mbetur në tentativë”.
Avokatët theksojnë faktin se objekt i shpërthimit ka qenë automjeti i Menës dhe jo vet ai. Kjo gjë sipas tyre provohet nga pamjet filmike të vendit të ngjarjes, por edhe nga dëshmia e Gjon Menës. Prokuroria ka si provë më të fortë dëshminë e Enver Jakimi i cili ka rrëfyer se Cukali do ju jepte atyre 30 mijë euro për të vendosur eksplozivin në automjetin e Menës.
Jakimi pretendon se kur ka vënë lëndën plasëse ka telefonuar Cukalin duke i thënë qe ia kemi vendosur poshtë gomës pasi nuk fiksohej siç duhej në mjet. Ky deklarim i tij, pritet që të faktohet ose rrëzohet nga tabulatet telefonike, që organi i akuzës pritet që ti ketë shumë shpejt në dorë.
Për këtë ngjarje në pranga ka rënë edhe kushëriri i Jakimit, Edmond Jakimi. Për tu theksuar është fakti që dy kushërinjtë në seancën e mbajtur janë tërhequr nga deklarata e parë ku akuzonin Cukalin si porositës të atentatit, ndaj Gjon Menës.
/a.r
