Gjergj Bojaxhi ka bërë publike nismën e tij për krijimin e një partie të re politike.
I ftuar i Mustafa Nanos në Zululand, ai foli rreth kësaj alternative të re në një situatë politike, e cila sipas tij nuk përfaqëson gjithë shqiptarët.
Bojaxhi tha se krijimi i kësaj partie është vetëm një pikënisje, ndërsa theksoi se vendimarrja e kësaj partie, do të jetë një anëtar një votë.
“Për karrierën politike në këtë parti do të zbatohet parimi, një anëtar, një votë. Ky është thelbi i një gjëje të re”, u shpreh Bojaxhi në Zululand.
Në bisedën e zhvilluar në studio Mustafa Nano i tha Bojaxhiut se ai “duhet t’i bëjë hesapet me një shoqëri të zhytur në apati”, por kandidati i pavarur për Bashkinë e Tiranës në zgjedhjet e 21 qershorit tha se partia që do të formohet synon që të përfaqësojë sa më shumë njerëz dhe të jetë zëri i tyre.
Më tej biseda në studio u fokusua edhe tek Reforma në Drejtësi, për të cilën Gjergj Bojaxhi u shpreh se problemi i saj nuk është teknik, por janë njerëzit. Sipas tij dikush duhet tu thotë shqiptarëve se me këtë draft që është hartuar Shqipëria humbet sovranitetin dhe kthehet në një lloj protektorati ndërkombëtar.
