Bashkëthemeluesi i partisë Sfida për Shqipërinë, Gjergj Bojaxhi, gjate nje takimi me studente, ka vene theksin ne faktin se Shqipëria ne gjithe keto vite ka shërbyer si një laborator, ku liderët politikë, nga Berisha te Nano dhe nga Rama te Basha, kanë bërë eksperimente në dobi të interesave personale.
“Që nga viti ’90 Shqipëria ka qenë në një provëz eksperimentale. Eksperimenti Berisha ishte i pari që falë mendësisë dhe reminishencave të së shkuarës solli pushtetin presidencial si në vendet diktatoriale deri kur ra nga pushteti prej firmave piramidale që i toleroi deri në lulëzimin e ekzagjeruar të tyre,” u shpreh Bojaxhi.
Bashkëthemeluesi i partisë Sfida për Shqipërinë gjatë ketij takimi të hapur me studentë e trajtoi situatën politike në vend të parë në një këndvështrim kronologjik.
“Eksperimenti i rradhës do të ishte eksperimenti Nano, i cili e shndërroi qeverisjen në etalon të degradimit dhe korrupsionit nën maskën e liberalitetit derisa dhe ky degradoi në vetërrëzim duke i hapur rrugën rikthimit të eksperimentit të radhës sërish nga Berisha. Njerëzit besuan se ai kishte ndryshuar dhe në fakt kishte ndryshuar nga mbretërimi i parë. Këtë herë Berisha ishte tolerant ndaj aferave, korrupsionit dhe klaneve që zhvasnin paratë publike. Degradimi i Berishës se dytë erdhi dhe i la vendin eksperimentit Rama me shpresën e madhe te rilindjes që po rezulton një rivdekje. Përfshirja e krimit në politikë dhe institucione ishte eksperimenti i radhës që iu ofrua shqiptarëve,” tha Bojaxhi.
Sipas tij alternativa Basha nuk premton përmirësim:
“Ndërkohë në rradhë pret një “Eksperiment i Provuar” që shërbimin më të mirë që mund të bëjë është asgjëja. Basha dhe asgjëja janë një binom i pandashëm dhe i provuar, ndaj do të ishte fatalitet të vijojmë të mbetemi në këto eksperimente të stërprovuara,” u shpreh themeluesi i Sfida për Shqipërinë.
Bojaxhi, i cili e pasqyroi diskutimin në faqen e tij në Facebook, përfundon duke shprehur vizionin e tij për të dalë “nga ky eksperiment 27-vjeçar”.
“Shqiptarët kanë nevojë për vlera dhe njerëz që i bartin. Është koha e realiteteve, është koha e të vërtetave. Është koha të ndërmarrim Sfidën për Shqipërinë”, u shpreh Gjergj Bojaxhi në diskutimin e tij me studentët.
ma.me
