Një studim i publikuar së fundmi në SHBA ka zbuluar se nën Detin Salton në Kaliforninë jugore fshihet një sasi “mbresëlënëse” e litiumit, që ka surprizuar shkencëtarët.
Liqeni më i madh i shtetit ndodhet mbi një depozitë me litium, diçka që shkencëtarët e dinin tashmë, por ajo që ata nuk e dinin ishte sasia e këtij elementi kimik.
Departamenti i Energjisë financoi një studim që filloi të hulumtonte Detin Salton në përpjekje për të analizuar saktësisht se sa litium shtrihej nën trupin e tij dhe u zbulua se ka 18 milionë tonë litium, i cilësuar si ‘ari i bardhë’ për shkak të vlerës dhe pamjes së tij.
Guvernatori i Kalifornisë, Gavin Newsom e ka quajtur Detin Salton si “Arabia Saudite e minierave të litiumit” dhe gjetjet e studimit me siguri vërtetojnë arsyen.
18 milionë tonë litium do të mjaftonte për të prodhuar më shumë se 382 milionë bateri për automjetet elektrike, ndaj kjo e bën depozitën me bazë në Kaliforni më të madhen në botë.
Një ton metrikë litium vlen rreth 29,000 dollarë, kështu që duke pasur parasysh këtë shifër, Deti Salton mund të fshehë mallra me vlerë 540 miliardë dollarë.
Një nga 22 autorët e studimit, Michael McKibben, një profesor i gjeokimisë në Universitetin e Kalifornisë, Riverside, tha për gjetjet: “Kjo është një nga depozitat më të mëdha të litiumit në botë dhe mund t’i bëjë Shtetet e Bashkuara plotësisht të vetë-mjaftueshme në litium dhe të ndalojnë importimin e tij nga Kina”.
Sammy Roth, një kolumnist i klimës për Los Angeles Times, tha për emisionin e radios KJZZ: “Është e ditur prej një kohe të gjatë që ka një grumbull litiumi thellë nën skajin jugor të Detit Salton. Ky raport i ri i qeverisë federale është me të vërtetë mbresëlënës. Ata zbuluan se ka potencialisht mjaft litium atje poshtë për të fuqizuar bateritë për 382 milionë automjete elektrike, më shumë automjete sesa janë aktualisht në rrugë në Shtetet e Bashkuara.”
