Gjergj Cukali, i arrestuar tri ditë më parë me akuzën se ishte kreu i grupit të shitjes së kokainës së pastër në Tiranë, përdorte një emër të rremë.
Për të larguar dyshimet që normalisht ngrinte emri i tij, “i forti i rrugës ‘Myslym Shyri’” kishte siguruar dokumente identiteti dhe një patentë me emër të rremë. Cukali ka marrë kartë identiteti me emrin Ergi Hoxha, që prej majit të vitit 2012. Me këtë identitet, Gjergj Cukali lëvizte lirshëm si brenda, ashtu edhe jashtë vendit, pasi kishte arritur të siguronte edhe një patentë.
Tashmë ndaj 37-vjeçarit është ngritur gjithashtu edhe akuza e “falsifikimit të dokumenteve”. Tri dokumentet e sekuestruara në cilësinë e provës materiale janë dërguar në laboratorin e Policisë Shkencore për ekspertizë.
BLLOKU ME KLIENTËT E KOKAINËS
Në vazhdim të hetimeve, mësohet se në banesën e “financieres” së grupit të drogës, që drejtohej nga Gjergj Cukali, Policia e Tiranës ka gjetur edhe një bilanc tjetër, veç atij të shitjes së dozave të kokainës.
Bëhet fjalë për një bllok me emrat e 15 personave, që kishin lënë peng çelësat e makinës, pasi nuk kishin paguar paratë e drogës që kishin blerë te Vjollca Gjoka. Burime nga Policia thanë se këta persona kanë nisur të thirren dhe të merren në pyetje një nga një në Drejtorinë e Policisë së Tiranës.
Gjatë fazës së hetimeve ishte zbuluar se grupi që drejtohej nga i ashtuquajturi “i forti i ‘Myslym Shyrit’”, përveç shitjes për persona të rastësishëm, kishte krijuar edhe “klientë” të rregullt.
Ata mund të merrnin sasi të ndryshme kokaine edhe pa para. Por, në rast se shlyerja e parave nuk kryhej brenda muajit, ata duhej të linin një garanci te Cukali, derisa të bënin pagesën.
Kryesisht si garanci dorëzonin çelësat e makinave. Policia tha dje se 15 çelësa të tillë makinash, që ishin lënë peng për paratë e drogës, u sekuestruan gjatë operacionit. Sipas Policisë, ka dyshime se Gjergj Cukali dhe bashkëpunëtorët e tij kishin grumbulluar aq kapital me para të përfituara nga shitja e kokainës, sa që jepnin edhe para me fajde, si edhe në shumë raste jepnin kokainë pa para, por në këmbim mbanin peng mjete luksoze.
Burimet thanë se persona të ndryshëm, disa prej tyre të konsideruar si klientë “VIP”, për shkak se kishin biznese të ndryshme, shkonin te Cukali për të marrë kokainë pa para dhe linin tek ai makina luksoze si garanci për të kryer pagesën në fund të çdo muaji.
Për këtë arsye, bashkëpunëtorja më e afërt e Cukalit, Vjollca Gjoka, mbante një listë të borxhlinjve të drogës. Në këtë formë grupi hetimor duket se ka dokumentuar plotësisht veprimtarinë kriminale të shitjes së drogës nga Gjergj Cukali./Panorama/a.k
