Nënkryetari i PD-së, njëherësh edhe nënkryetar i Kuvendit, Agron Gjekmarkaj, ka folur para emigrantëve shqiptarë në Romë, të Italisë, ku u ka bërë thirrje të votojnë në zgjedhjet e 11 majit.
Gjekmarkaj u shprehet se vullneti i emigrantëve është vendimtar, ndërsa u bëri thirrje që të votojnë.
“Ju bëj thirrje sot, përdoreni solemnitetin e votës tuaj vota juaj është arma më e fortë për të garantuar një Shqipëri demokratike”, tha ai.
Gjekmarkaj: Ju jeni atdheu që gjen shpresën në çdo thirrje dhe veprim tuajin. Ju jeni malli dhe krenaria që nuk shuhen kurrë. Jemi mbledhur në vendin e dashur mik, në vendin e qytetërimit evropian, në vendin e dijetarëve, perandorëve, poetëve dhe navigatorëve. Në tokë pjellore të mendjes e punë, në Romën e përjetshme, në këtë takim madhështor, në këtë takim të fitores.
Sali Berisha është këtu mes jush për të bashkë ndarë projektin e madh të ringritjes së Shqipërisë dhe firmosjes së Shqipërisë që kthehet, dhe jo të dëbon.
Qytetarët do të kthehen dhe Edi Rama do të ikë. Zgjedhjet e 11 majit janë një moment kritik për të ardhmen e Shqipërisë dhe kërkon verdiktin tuaj, për të cilin PD ka luftuar.
Një armë e ndershme dhe e drejtë për çdo shqiptarët, varet nga vota juaj. Vullneti juaj është vendimtar, sepse e shikoni nga larg Shqipërinë, por me dashurinë dhe përkushtimin që vetëm një shqiptarë ka për vendin e vetë.
Ju bëj thirrje sot, përdoreni solemnitetin e votës tuaj vota juaj është arma më e fortë për të garantuar një Shqipëri demokratike.
